تحكومنا حول جدتي تحكي لنا
حكاياها الجميلة ... و كنت احبها اكثر من اي شيء في الدنيا ......كنت انظر الى
وجهها الاسمر الجميل و قد علته التجاعيد ..... مبهورة بتلك الوشمة الزرقاء التي
زينت ذقنها ...
" بدي احكي
لك عن شكي عن بكي عن دبس البعلبكي ..... عن ستي ام سليمان .... كان في قديم الزمان
... كان في رجل بسيط مؤمن اسمه عبد الهادي ... و كان بيعيش بجبل عامل .... و في
يوم من ايام شهر رمضان ... قالوا لرفيقه ... تروح جميل لنروح على الجامع .... و
مشيوا ... وصلوا و جلسوا على الحصيرة القش ... و صار الشيخ يحكي للناس عن ليلة
القدر و اعمال ليلة القدر .....و الناس كانوا مفتونين بالشيخ و بكلاموا ....و عبد
الهادي كان اكثر المسحورين بكلمات الشيخ و صار يحلم انوا يشوفها .....
و قالوا لرفيقه جميل هني و راجعين ... " جميل انا راح احيي ليلة القدر ... و
رح ظل سهران لشوفها و بس شوفه.ا ... رح اطلب من ربي يرزقني انا وولادي مال كثير ...."
رد رفيقه جميل
"عبد الهادي خلي عقلك كبير ... نحن ناس عاديين ... ما بنقدر نشوفها "
عبد الهادي تحدى جميل و كل
صحابو و قرايبو " قالهم الله بيستجيب للناس في دعاهم "
ردوا قالولو "نحن
عنا خطايا كثير ... و ليلة القدر ما بتكتشف ... علينا "
عبد الهادي ما رد علناس و
حمل معه قنينة ماء و كتاب دعاء و قرأن كريم ......و ووصل على السطح جلس جلسة العبد
البسيط امام سيده ... كان قباله القمر ..... و السما السودا ... ركع كثير و صلى
اكثر ... سبح ربه ... و حمده كثير ... و نامت كل الناس ببلدته .....و ساعة
ورا ساعة مرت ... ما زهق من الصلاة ..و حتى سمعت صلاته كل كائنات الارض
...جندب الليل ... كان بيناجي ... وضفدع الساقية كان بيحكي و يلاغي ....و قرمش
الجبل كان بينط من السطح على السطح لجنبوا .....كل هلمخلوقات كانوا سهرانين و شاهدين
....غالب عينه و ما غمضها ...غالب ايداه و رجليه و صلى وصلى .....لا كل و لا تعب
...ضل يدعي و يدعي ... و ساعة ورا ساعة ... ما زهق من منجاتو لربوا و شكروا على
نعمتوا .كثير... عاند نفسوا و ما نام و لا غمض جفنوا ... بس بالنهاية قد
شو رح يقدر يقاوم النوم و سلطانوا ... سهيت عينه ..... و فاق فجأة و
عم يقول لحاله ... انا لازم اصلي و ادعي ... و طلع بالسما و شو شاف ...
منورة كانت الدنيا ....و النجوم كانت ساجدة ... طلع ببيت جاره جميل كان ساجد
...بيت نجيب كمان كان ساجد .... كل بيوت البلدة كانت ساجدة لخالقها ....و
بها اللحظة هو شو عمل .... تمو ما عرف يقول الا كلمة واحدة سبحان الله
....... سبحان الله .... وظل يقول سبحان الله ... لرجع نام ... و الصبح حكى للناس
.... قالهم انو لبيشوف ليلة القدر ما بعود تمه يعرف يقول الا كلمة واحدة هي
سبحان الله ....كل الماديات بينسى ... و غير الله ما بيمجد ... و بقولوا الناس انو
عبد الهادي الله ما رزقوا لا المال و لا الجاه ....بس ضل تقي
كثير .... وولادوا الله رزقهم المال و الدين ...و عاشوا مستورين مكرمين بفضل دعا
ليلة القدر لشافها عبد الهادي في يوم من ايام شهر رمضان العشرة الاخيرة ...تقبل
الله اعملكم في ليلة القدر ..." ليلة القدر خير من الف شهر تنزل الله
فيها الملائكة و الروح باذن ربهم من كل امر سلام هي حتى مطلع
الفجر"......
وفاء احمد بزي
12/8/2012
الموافق 23 رمضان هجري
تعليقات